Молитва Пресвятой Богородице перед Ея иконой, именуемой "Беседная"

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, якоже иногда всю Российскую страну удивила еси преславным по воздуху пречестныя Твоея со Предвечным Младенцем иконы хождением, и святым тоя посещением град Тихвин, место же сие пустынно сущее, истинным самосошествием и пречудным Твоим со святителем Николаем явлением возвеличила еси: тако и ныне. о Всеблагая Мати Бога Вышняго, сподобивши ны невидимыя Твоея благодати ко приятию, покрый ны всеблагим Твоим покровом. И якоже древле в богоизбранном пустыни сея месте богоугоднаго и благоговейнаго мужа Божественный зрак неизреченнаго сияния Твоего видети удостоивши, милостивно к тому возглаголала еси: тако и ныне благосердыма очима Твоима, о Всепетая Богомати, со обычною Ти любовию воззревши на ны и на всех усердно молящихся и умильно просящих Твоея всесильныя помощи и заступления, буди Всеблагая спасения душ и телес наших Ходатаица пред Престолом Сына Твоего и Бога нашего. Спасай убо, о Пресвятая Дево Богородительнице, обитель сию и весь род христианский, и вся с верою приходящия и поклоняющияся Пречестному Кресту Чудотворному, егоже вещество Сама освятила еси, и Пречистей иконе явления Твоего, славящия же Пречистую Троицу, Отца и Сына и Святаго Духа, и Твое милостивное со святым Николаем предстательство, ныне и присно и во веки веков. Аминь.