Молитва преподобному Стефану Махрищскому

Всеблаженне и преподобне отче Стефане, прославленный угодниче Пресвятыя Троицы, престолу Ея предстоя c лики святых Ангел и всех святых, помяни нас в бедах и скорбех припадающих к цельбоносному твоему гробу и молящихся тебе: услыши молитвы наши и принеси к престолу триипостаснаго Бога, прося у Него нам богатыя милости, здравия душам и телесам нашим, наипаче же отпущения грехов, благодати и спасения. Ты бо, имея дерзновение к Нему, можеши умолити Его, да подаст нам в житии нашем благая и вся, яже на пользу нашу и во уготовление к вечному животу.

О благий и верный рабе Божий, истинный учениче Христа, избранный сосуде Святаго Духа, чудотворче Стефане, молим тя усердно: сотвори нас грешных причастники быти благодатных дарований, имиже Бог тя обогати, и буди нам по Бозе наставник к богоугодному житию, утишитель бури страстей, помощник в скорбех и бедах, и заступник от враг видимых и невидимых: да и мы, богоугодно прошедше поприще сея жизни, твоим предстательством и богоприятными твоими молитвами, будем наследницы царствия Божия, и сподобимся вкупе с тобою предстояти престолу Царя славы, Емуже подобает всякая слава, честь и держава во веки веков. Аминь.